ILEI kun plezuro anoncas la aperigon de la Simpozia Kajero el nia Konferenco en Parma en 2006, kiu estis organizita kunlabore kun la Universitato de Parma (Departamento pri Fremdaj Lingvoj kaj Literaturo), Itala Esperanto-Federacio kaj la itala sekcio de ILEI.

La kajero estas trilingva (Esperanta, angla, itala) kun 53 grandformataj paĝoj. Ĝi troviĝas nun en la retejo de ILEI en PDF formato (PDF-varianto 1.5). Ĝi aldoniĝas tie al la kajero el Krakovo kie okazis Simpozio en 2009. Tiuj verkoj ricevos plian kontroladon, prepare al dua reteldono, kiu formos la bazon por fizika aperigo en tre modesta eldonkvanto.

Ni kore dankas al la organizintoj de tiu evento, al nia redaktoro Jozefo Nemeth kiu akceptis la komision de la nova estraro plenumi la lastajn partojn de la enpaĝiga kaj kunordiga laboro, al la lingvaj reviziintoj, kaj al la kontribuintoj, kiuj devis tro streĉi sian paciencon, atendante tra kvar jaroj por vidi la fruktojn de sia laboro.

La kajero krome prezentas apendice resumon pri la enhavo de la Simpozio en Kaunas, Litovio en julio 2005.

La retversioj de la kajeroj el Parma kaj Krakovo estas senpage je via dispono, sed ni petas vin memori, ke eĉ reteldono por ILEI tute ne estas senkosta! Por helpi al ni kovri tiujn kostojn, kaj realigi iliajn aperigojn en presita formo, kaj subteni la novan simpozion en Kopenhago en julio 2010, viaj donacoj al nia Fonduso Szerdahelyi tre bonvenas. Legu pri niaj fondusoj kaj kasoj en la financa parto de la retejo http://www.ilei.info , ene de la rubriko 'Dokumentoj'. Antaŭdankon pro via subteno, kaj agrablan legadon!

Stefan MacGill, Prezidanto, ILEI